Iniluwas na kan International Criminal Court (ICC) Office of the Prosecutor an mga detalye kan kaso laban ki dating Presidente Rodrigo Duterte.
An nasabing dokumento an isinunad kan Office of the Prosecutors na kompwesto nin mga krimen na gagamiton kan Pre-Trial Chamber.
An Document Containing of the Charges (DCC) an basehan para sa confirmation of charges hearing.
Basado sa dokumento na pigpapanimbag kan prosecutors an dating presidente an mga minasunod na kaso:
- Murder bilang crime against humanity sa Davao City kan ini alkalde sa pagultangan kan 2013 hanggang 2016.
- Murder bilang crime against humanity laban sa “high value targets” sa mga manlaen-laeng lugar sa Pilipinas kan ini presidente puon 2016 sagkod 2017.
- Murder asin attempted murder bilang crimes against humanity sa barangay clearance operations sa manlaen-laeng lugar sa nacion kan ini an presidente puon 2016 sagkod 2018.
Iniladawan pa kan prosecutors an 49 na insidente na nagsusuporta sa kaso kun saen igwang kabilogang 78 na biktima, 19 biktima sa count 1; 14 biktima man sa count 2 asin 45 biktima man sa count 3.
Mahihiling sa dokumento na si Duterte an nasa likod kan nasabing mga kaso huli sa pagtagama nin pondo, pagbugtak nin mga tawo nganing maisakatuparan an saiyang ‘war on drugs’ .
Kasabay man kaini an iniluwas an “Pre-Confirmation Brief” na nagtatao nin mga detalyadong paliwanag kan prosecutions sa mga ebidensya asin argumento na nagsusuporta sa mga kaso laban kay Duterte.
Magigiromdomang ipigtalaang ngunyan na Setyembre 23 an confirmation of charges hearing kan dating Presidente alagad ipig-octaba ini kan depensa huli sa nagkaigwa nin isyu sa saiyang salud an dating Presidente kun saen dae niya matandaan an mga pangyayari asin nagigin ulyanin suboot ini.
