LEGAZPI CITY-Nagin matrayumpo an pagselebrar kan Ibalong Festival 2025 huli sa sa warang nairehistrong anumang insidente sa ciudad kan Legazpi.
Segun kay Legazpi Public Safety Office Head Octavio Rivero, sa intrevista kan Bombo Radyo Legazpi na nagin matrayumpo an nasabing selebrasyon asin warang nairehistrong insidente sa maski anuman na presentasyon asin konsiyerto.
Naoogma man suboot siya huli sa nagin normal an sitwasyon asin nakapagselebrar nin matanos an mga tawo.
Dugang pa ni Octavio na napano an Old Albay Airport huli sa konsiyerto kan BINI kun sain nagdagsaan an mga tawo para sa nasabing selebrasyon.
Dai man suboot nin mga nanotarang pasaway na nagsisigarilyo o vape sa mga lugar.
Nagin marhay man suboot an sitwayson sa luwas kan area kun sain katuwang an Philippine Nationa Police asin iba pang otoridad sa pagmamantenir kan trapiko sa mga lugar.
Nasunod man suboot an saindang plano sa pagmantenir kan gabat kan trapiko huli sa mga pigbugtak na mga signages siring kan one way, one side parking, asin no parking.
Pigpapasalamatan man kan opisyal an gabos na nagin katuwang asin parte kan selebrasyon para sa Ibalong Festival ngonian na taon.
Mientrastanto, tututukan man sa ngonian kan grupo an mga reklamo sa iligal na parkings kairiba na an parte kan Ems Barrio, Orosite asin sa sentro kan Legazpi ngani na malinig an mga tinampo sa ciudad.
