Ibinuyagyag kan Department of Justice na posibleng igwa pang mga lawas an itinapok man suboot sa ibang parte kan Taal lake na katakod pa sa ibang kaso afuera sa mga nawawarang sabungero.
Ipigheras ni Justice Secretary Jesus Crispin Remulla na igwa sindang impormasyon ngunyan na pighiling na nagsasabing an pira sa mga lawas kaini an pwedesir may kinaaraman sa ‘war on drugs’.
Afuera kaya sa ground zero kan pigkundusir na ‘search and retrieval operations’ sa Taal lake, segun ki Secretary Remulla, igwang pang siraan an ipigkonsiderar na pigtapukan man suboot nin mga lawas.
Kaya sainda ining pig-imbestigaran huli an pagkakadiskubre digdi an iba pa sa imbestigasyong ipigsagibo mapadapit sa pagkawara kan mga sabungero.
Mientrastanto, katakod man digdi, ipigheras pa ni Justice Secretary Remulla na saiyang ipigsugo nang ipahukay an pirang bangkay sa Batangas nganing magsairarom sa pagsusuri.
Pagdoon kaya kaini na ini pig-imbestigaran huli warang pamilya o kaparientes an nagkua sa mga bangkay na nadiskubre pa kan 2020.
Afuera suboot sa mga nawawarang sabungero, mawot man tawan nin linaw kan ahensya an nagkapira pang kaso nin ‘disappearances’ kaiba an tulong lawas na saiyang ipigpahukay na.
Huli digdi, ipig-iba na man kan nasabing ahensya an pag-iimbestigar mapadapit sa iba pang kaso nin pagkawara na nahihiling na may koneksyon sa nangyaring ‘war on drugs’.
Alagad pig-asigurar na sinda nakasentro man giraray sa ipigkundusir na imbestigasyon mapadapit sa mga nawawarang sabungero.
Mantang nakasentro an Department of Justice sa imbestigasyon sa pagkawara kan mga sabungero, tinawan-duon man kan presenteng kalihim na si Secretary Remulla na dae ninda isasantabi nadiskubreng posibilidad sa pagkakatakod kan mga nawawarang sabungero sa nakaaging ‘war on drugs’.
