LEGAZPI CITY—Arestado an sarong high-value individual sa ikinasar na buy-bust operation kan mga otoridad sa Barangay Bitano, Legazpi City.
Binisto an suspek na si alyas “Danny” asin residente kan Barangay Holy Spirit, Quezon City.
Nadakop ini makalihis na magpabakal nin 5 gramos nin pigtutubudang shabu sa sarong undercover operative na may Standard Drug Price na P34,000 karibay kan P15,000 na buy-bust money.
Sa padagos na pagrepaso asin pagrekisa, nakumpiskar man sa suspek an nasa 100 gramos nin pigtutubudang shabu na may pigkarkulong kantidad na P680,000 asin an ginamit na buy-bust money.
Naarestar an suspek sa pinagsarong operatiba kan Legazpi City Police Station, City Drug Enforcement Unit, Philippine Drug Enforcement Agency (PDEA) Albay Provincial Office, asin PDEA-Regional Office 5.
Mientrastanto, mahahampang an suspek sa kasong pagbalgar sa Republic Act 9165 o Comprehensive Dangerous Drugs Act of 2002.
Nasa kustodiya ngonian kan Legazpi CPS an suspek mantang pigsasagibo an magkakanigong dokumentasyon asin pagsunad nin kaso.
