LEGAZPI CITY- (Update) Naglalaom an pamilya na nabiktima kan panghahabon sa Vel-Amor Subdivision sa Brgy. Cabangan sa ciudad kan Legazpi na mapapanimbag pa an responsable sa insidente.
Sa ekslusibong intrevista kan Bombo Radyo Legazpi ki Ruth Rogacion, aki kan kagsadiri kan harong na si Aurora Rogacion, 83-anyos, nuncang piglaoman an insidente urog na alas-8:00 pa sana nin banggi asin dakol pa an nagraralakaw na tawo sa luwas.
Tulong lalaki an naglaog sa harong kun sain saro an may darang patarom, saro an igwang gari replica kan patarom mantang saro an bako man armado nin anupaman alagad pigsasabing enot na nangulog.
Segun ki Ruth, nagbalo pa sindang manlaban urog na afuera sa tulong babayi na yaon, nagtabang man an saro pang 27-anyos na lalaking pamangkin na hali pa sana sa Manila asin napag-aramang ‘deaf and mute’ alagad mas makusog an mga suspek na nakatahob man an pandok.
Pigsasabing ikinulong pa an mga biktima sa banyo kan first floor mantang nilalay an mga mamahalon na gadget asin cash na maabot sa P40, 000 saka naghali.
Nagtutubod man si Ruth na pighiling na bentahe kan mga suspek na under construction an kabangang porsyon kan harong mantang anas babayi man an mga tawong nasa laog kan harong.
Mientras tanto, sa ngonian pinag-iisipan naman kan pamilya an pagsasagibo nin dugang na security measures sa lugar mantang padagos an koordinasyon sa pulisya para sa pagkakaarestar kan mga suspek.
