LEGAZPI CITY-Makikisaro an mga grupo nin mga parasisira sa isasagibong hiro protesta ngonian na aldaw bilang pagkondina sa kurapsyon sa mga maanomalyang flood control projects.
Segun kay PAMALAKAYA Presidente Pando Hicap, sa intrevista kan Bombo Radyo Legazpi, na makikisaro an saindang grupo sa mahewasang pagbilog nin mga namamanwaan laban sa naglala na kurapsyon sa nacion.
Magigin parte suboot an nasabing grupo kairiba na an mga organizer sa mga nangangapudan na ipaluwas an dagit sa kalunos-lunos asin malalang pangyayari asin kurapsyon sa gobierno.
Dagdag pa ni Hicap na masanib-puwersa an bilog na chapter kan PAMALAKAYA sa nacion bako sana sa Luneta, magin sa bilog na banwaan siring kan Naga, Legazpi, Sorsogon, asin mga sentrong banwaan kun sain igwang myembro o chapter an saindang grupo, bilang parte kan pangangapudan na mapanimbag an gabos na imbuelto sa kurapsyon magpoon sa pinakahababa hasta sa pinakahalangkaw na posisyon, asin bako sana sa panahon ni President Bong Bong Marcos, kundi magin sa mga nakalihis na administrasyon.
Sinabi pa niya na dai masukol kun gano katindi an epekto kan mga katiwalian sa isyu kan flood control asin mahihiling na mismong sinda an nagkikita, nagsasamantala kan mga pondo, asin dai naipapaotob nin maayos an mga proyekto.
Huli digdi, apektado suboot kaini an mga parasisira, mga pananom kan mga paraooma, asin mga harong asin kagamitan, huli sa kadiit na uran an lubog na an nagkapirang lugar.
Labing apektado man suboot an kabuhayan kan mga parasisira siring na an pagkaraot kan mga siraan, coral reefs, asin mangrove areas, kun sain nagpapatugdok nin mga coastal roads asin mga imprastraktura.
Nangangapudan man an grupo sa mga parasisira , magin sa publiko na makisaro, kondinahon, asin ipahiling an dagit ngani matapos na an malala asin diplomatikong kurapsyon sa nakalihis na rehimen asin sa presenteng panahon.
