LEGAZPI CITY – Kinondena kan Pambansang Lakas ng Kilusang Mamamalakaya ng Pilipinas an panibagong insidente nin pangha-harass kan China Coast Guard sa West Philippine Sea (WPS) na nagresulta sa pagka-irido kan tulong Pilipinong parasisira makalihis i-water cannon an saindang mga bangka.
Segun ki Pamalakaya Chairperson Ka Pando Hicap sa intrevista kan Bombo Radyo Legazpi na binomba kan China Coast Guard an mga parasisira sa Escoda Shoal na malinaw na nasa laog ini kan Exclusive Economic Zone (EEZ) kan Pilipinas.
Nagpapahiling man suboot an insidente na dae pigrerespeto kan China an soberanya kan Pilipinas kun kaya dapat kondenahon ini kan gabos na mga Pilipino an mga siring kaining bako katanggap-tanggap na gawi.
Punto pa niya na bako epektibo an pamamalakad ni Presidente Ferdinand Marcos Jr. asin kan saiyang gobyerno sa pagdoon kan matuninong pag-oolay sa pagultangan kan duwang nacion na nagigin biktima an mga parasisira.
Pigtaram pa kan opisyal na dae malilikayan na may mabalik na parasisira sa Escoda Shoal sa ibong kan nangyaring pangha-harass kan China huli ta kaipuhan nindang magsira nganing mabuhay urog nang wara mang pigtataong tabang an gobyerno.
Alagad suhestyon niya man na kun mawot tabangan kan gobierno an mga biktimang parasisira, dapat na magdulok na ini sa international tribunal asin ireklamo an China sa saindang ginibo asin ipahiling kan Pilipinas na dae ninda papalagpason an mga siring kaining pangyayari.
Pangapodan man ni Hicap sa mga namamanwaan kan China na kondenahon an mga agresibong aksyon kan saindang gobierno huli ta sinda an maaapektaran enkaso maglala pa an tensyon sa West Philippine Sea.
 that resulted in the injury of three Filipino fishermen after their boats were water cannoned.){kind=link}