Pinunan na liwat kan Estados Unidos asin Israeli Military Forces na puntiryahon an mga fuel depots kan Iran ngonian na Domingo, Marso 8, makalihis kan nagkapirang darakulang pagsabog asin kasulo na nangyari sa syudad nin Tehran.
Segun sa Israeli military, an pagbomba sa mga oil storage facilities kan Iran an parte kan inapod kaining “next phase of war” huli ta saro ini sa mga supplier nin krudo sa military forces kan Iran, na may katuyuhan na orog pang raoton an military infrastructure kan nasyon.
Bago kaini, pigpuntirya man kan Israel an dakulang bilang nin mga fuel storage facility sa naunambitang nacion kan Marso 7.
Kasunod ini kan pahayag ni United States President Donald Trump na naghahagad nin ‘unconditional surrender’ sa gobyerno kan Iran asin nagsasabi na matatapos sana an giyera sa pagultanan kan mga nasyon kun magsuko na an Iran o sagkod na dae na operational an pwersa militar kaini.
Mientrastanto, magigirumduman man na dati nang naghagad si Iranian President Masoud Pezehkian nin dispensa sa saiyang kataraid na nasyon, na parte kan Gulf States, huli sa serye nin mga missile attacks.
Sinabi niya na mas marahay para sa mga Gulf nations na dai magpasakop o magin “mga kawatan” para sa imperyalismo kan Estados Unidos asin magin mga kasangkapan nganing punteriyahon an saindang mga teritoryo.
Mientrastanto, pagkatapos kaini, inihayag man kan Top Iranian Official Ali Larijani na mabayad an Estados Unidos para sa saindang mga aksyon asin magin an saindang pagpoon nin gera sa Gitnang Silangan.
