LEGAZPI CITY—Pinuonan na kan gobierno provincial kan Sorsogon an pagbabarewas nin fuel cash assistance sa mga tricycle drivers bilang kasimbagan sa nagpapadagos na paghalangkaw sa presyo kan produktong petrolyo.
Segun ki Sorsogon Provincial Spokesperson Dong Mendoza, sa intrevista kan Bombo Radyo Legazpi, pigkakarkulong pocomas o menos 13,000 na mga tricycle drivers asin operators na legal na nagpapasada sa provincia an mabebenipisyuhan kan asistensya.
Pagdoon niya na maximum nin 7 litro an saindang pigtatao sa kada tricycle unit kun sain sainda man ining pigmo-monitor nganing masierto na gasolina an saindang maitatao asin bako kwarta.
Dugang ni Mendoza na pag-uulayan man ninda an pagtabang sa iba pang sektor na apektado kan paghalangkaw kan presyo nin langis siring kan mga parasisira.
Mientrastanto, katakod man kan preparasyon sa paparaning Semana Santa, piggibo na man suboot ninda an gabos na lakdang nganing maasigurar na magin maayos an pagbisita kan mga deboto sa mga religious sites sa saindang provincia.
