LEGAZPI CITY- Sa karsel an bagsak kan sarong freelance model makalihis na maaktuhang nagpapabakal nin illegal drugs sa Brgy. Maroroy, sa banwaan kan Daraga, Albay.
Binisto ining si Mark John Madridano, 26-anyos na residente kan Purok 4 Brgy. Bagumbayan sa kaparehong banwaan.
Sa intrevista kan Bombo Radyo Legazpi ki P/Supt. El Cid Roldan, hepe kan Daraa Municipal Police, nagkapirang semana na man suboot na ipigsasairaom sa surveillance asin monitoring si Madridano makalihis na makaresibe nin impormasyon na nagpadagos ini sa illegal activity.
Napag-araman na enot naman ining nagsurendir kaitong Setyembre 2016 sa irarom kan Oplan Tokhang.
Segun pa sa opisyal na nakipagtransaksyon an nasabing drug personality sa sarong pulis na nagpabistong buyer kan sarong sachet kan pigtutubudan na shabu karibay kan P500.00 na buy bust money.
Digdi na dinakop si Madridano mantang narekober man an tolo pang sachet kan pigtutubudang shabu, cellphone na ginamit sa transaksyon asin P800.00 cash.
Sa presente, ipighahanda na an kasong kakahampangon kan nasabing suspek sa pagbayolar sa Republic Act 9165 o Comprehensive Dangerous Drugs Act of 2002.
Mientras tanto, nagpagirumdom man si Roldan sa mga hotel and lodging house owners na magin malikay asin marigmat sa mga nagti-check in urog na kadaklan suboot sa mga illegal drug transactions ngonian an ipigtatago sa nasabing lugar.
Napag-araman na ini na an ikalimang beses na nagsagibo nin buy bust operation sa sarong hotel an nasabing hepatura kan pulis.
