LEGAZPI CITY — Ipighayag kan Masbate Police Provincial Office na may koneksyon suboot an nangyaring pambabadil sa pitong kalalakihan sa nangyari mang pagbadil sa sarong miembro kan Civilian Auxilliary Arm (CAA) sa provincia.
Sa intrevista kan Bombo Radyo Legazpi ki Masbate PPO PCR Branch Acting Chief Pol. C/Insp. Ariel Neri, magkasunod an nangyaring pambabadil kun saen naenot an pagbadil sa pitong mga kalalakihan na sinda Ronel Ariscon, 18; Marvin Cantre, 18; Ely Boy Bueta, 18; Larrel Barrun asin duwang menor de edad na anas residente kan Barangay Valparaiso sa banwaan kan SAn Fernando.
Susog sa insiyal na imbestigasyon, lunad an mga biktima sa motorsiklo asin pag-abot sa Barangayy Progreso kan parehong banwaan kan ulangan kan mga suspek na nakasulot nin itom na t-shirt.
Dae man nagpundo an mga biktima kun kaya pinaputukan na nagresulta sa tama sa mga bitis asin binti kan pitong kalalakihan.
Segun pa ki Neri, konektado an insidente sa pagbadil man ki Albert Almosara na miembro kan CAFGU sa Barangay Bayanihan.
An nasabing persona talaga kaya an target kan mga suspek na pigtutubudang miembro kan New People’s Army (NPA).
Nagtutubod man an opisyal na nagkataon man na yaon sa tinampo an mga suspek na naghahalat na igwang mag-abot na tropa kan gobierno alagad an mga jovenes an nag-agi.
Sa ngonian, wara pang ma-establisyar na motibo an mga otoridad dapit sa insidente.
