LEGAZPI CITY – Nakapagrehistro na nin pinakaenot na Pilipinong binawian nin buhay sa coronavirus disease (COVID-19) an East African country na Mozambique.
Kinumpirmar ni Philippine Honorary Consul to Maputo, Mozambique Donald Tulcidas sa Bombo Radyo Legazpi an pagkagadan kan 30-anyos na Pinoy makalihis na maaraman na positibo sa COVID-19.
Kritikal an nagin kondisyon kan Overseas Filipino Worker na naaraman na may dati nang helang na diabetes susog ki Consul Don mantang isinairarom pa sa respirator alagad kaining Huwebes kan bawian na nin buhay.
Pigtutubudang nakua kaini an virus sa direct contact sa kliyente sa pinagtatrabauhang Korean advertising company.
An nasabing kumpanya man an nagsimbag sa gabos na medical expenses kan Pinoy.
Mientras tanto, ipinaaram na sa nawalat na duwang aki asin esposa kan OFW an nangyari mantang nakatalaan na ining isairarom sa cremation ngonyan na Sabado.
Nag-atang man nin rosaryo asin pangadyi an komunidad kan mga Pilipino sa nasabing nasyon sa pamamaaram kan kahimanwa.
