LEGAZPI CITY – Pinartisiparan kan mga personahes kan fire marcial sa bilog na rehiyon an nagin aktibidad kan Bureau of Fire Protection katakod kan pagbubukas kan Fire prevention month.
Sa intrevista kan Bombo Radyo Legazpi ki Bicol Regional Director Fire Chief Supt. Igmedio Bondoc Jr., pighayag kaini na an nasambitan na aktibidad na inapod na ‘Lakaw Kabikolan’ an parte kan pagtatao nin fire safety awareness sa publiko katakod kan ika-51 taon kan fire prevention month sa bilog na Pilipinas.
Pighayag man ni Bondoc na igwang 158 na fire trucks asin 1, 457 personnel sa bilog na rehiyon an preparadong magresponde enkaso man magkaigwa nin kasulo.
Mientrastranto, inako man kan opisyal na sa ngunyan wara pang abilableng fire truck sa nagkapirang isla sa probinsya kan Albay siring kan Rapu-Rapu alagad nagkakaigwa nin koordinasyon sa mga Barangay ngani na urog na mapakusog an saindang kaaraman huli sa pagtubod na an pag-edukar sa mga tawo an paagi ngani na maibitaran an kasulo.
Dugang pa kaini na igwa man na mga pig-oorganisa na voluntary fire brigade para sa mga lugar na wara pang fire truck ngani na maagapan an anuman na insidente antes pa man mag-abot an mga bombero.
Nangapudan man an opisyal sa publiko na magin malikay sa pagamit nin kalayo ngani na maibitaran an anuman na dae piglalaoman na insidente.
