LEGAZPI CITY — Nagpaluwas ngonian nin bagong module an National Nutrition Council na ‘Idol ko si Nanay’ na target an mga nagbabados na ina tangarig na mapangatamanan an salud kan mga ini.
Pag-eksplikar ni Regional Nutrition Program Coordinator Arlene Reario sa intrevista kan Bombo Radyo Legazpi, kinakaipuhan na punan sa pagbabados pa sana kan ina an pangangataman sa nutrisyon kan umboy sa saindang sinapupunan tangarig na masubaybayan an mga ini hasta sa umabot sa edad na 2-anyos.
Dugang pa kan opisyal na kinakaipuhan man na maging prayoridad na benipisyaryo kan mga feeding program an mga bados na babayi siring man an mga aki.
Sa ibong kaini, aminado si Reario na saro an feeding program sa mga pinakadificil na programa na ipigpapaotob kontra sa malnutrisyon huli ta kinakaipuhan ining ma-sustain sa laog nin 90 aldaw na warang pundo tangarig magkaigwa nin epekto.
Kinakaipuhan man suboot na ibitaran na magamit kan mga politiko an nasambitan na programa sa mga ‘pa-pogi’ kan mga ini asin pagpapahamot kan saindang pangaran.
Mientras tanto, ipig-orgulyo man ni Reario na igwa na ngonian na mga feeding program sa mga daycare students asin sa mga underweight sa gabos na eskwelahan sa bilog na nacion susog sa programa kan national government.
