LEGAZPI CITY – Uminabot na sa 32,274 na mga estudyante asin 1,796 na mga teaching asin non-teaching personnel sa provincia kan Albay an apektado kan pangrarapado ni Super Typhoon Uwan.
Segun ki Schools Division Office Albay Spokesperson Froilan Tena sa intrevista kan Bombo Radyo Legazpi na basado sa saindang huring report, puminakol na sa 304 na mga eskwelahan an nadanyaran mantang 1,294 na mga classroom an idineklarang minor damage, 458 classrooms an nagsapo nin major damage asin 237 classrooms an totally damage.
Uminabot man sa 18,000 na mga learning materials asin 340 man na mga IT equipment an dae man nakaligtas sa pananalasa kan nasambitang raot nin panahon.
Kadaklan suboot na mga nagaba na mga classrooms an gikan pa sa first district mantang mga binaha na mga classrooms man an kinahampang na problema kan mga nasa tirser distrito.
Pigtaram pa kan opisyal na bako suspendido an klase ngonian asin base man sa direktiba kan Gobierno Provincial, nasa School Heads na an hurisdiksyon kun makondusir ini nin face-to-face classess o malipat sa alternative mode of learning.
Nagpatugdok na man sinda nin mga Temporary Learning Spaces para sa mga eskwelahan na nagkokondusir nin mga face-to-face classess alagad nagigin angat man an pabago-bagong panahon na nakaka-apektar sa mga estudyante.
Pagdoon man ni Tena na nagpapadagos an saindang assessment sa mga eskwelahan na naapektaran ni Super Typhoon Uwan nganing ma-alokaran nin pondo kan DepEd Central Office para sa pagpapakarhay kaini.
