Kinumpirmar kan sarong high-ranking police officer na kadaklan sa mga nairehistrong human rights violations an nangyari sa kasagsagan kan madugong drug war campaign sa irarom kan administrasyon ni dating Presidente Rodrigo Duterte.
Segun ki PLt. Col. Jovie Espinido na inabuso an tokhang kan mga yauhan na ugos sa dating presidente asin mga pag-iriba kaini sa PNP para sa pansadiring interes.
Pighayag ni Espinido na nagigibo kan mga pulis na magbayolar sa diretsos humanos ngani na maabot an saindang target.
Napag-araman kaya na nagtalaan nin quota an liderato kan pambasang pulisya nin 50 hasta 100 na mga magagadan na drug suspects kada aldaw asin nasa P20,000 an reward na mareresibe kan mga police officers.
Ipinaliwanag man ni Espenido na sa saiyang lado, ginibo ninda an tokhang ngani na magsurendir an mga drug suspects ngani na maisairarom sa rehabilitasyon.
Dugang pa ni Espinido na kan naka designar siya sa Ozamiz City, inapudan siya ni dating PNP chief asin ngunyan Senator Ronald dela Rosa na dae paghiruon an sarong alkalde na operator kan small town lottery asin pinagtutubudan na drug lord.
