LEGAZPI CITY – Pighihiling na rason kan sarong empleyado na nahali sa trabaho sa munispyo kan Sto. Domingo an saiyang nagin lakdang kan nakalihis na taon kun saen sinangatan niya nin kaso an alkalde kan banwaan na si Mayor Herbie Aguas.
Segun ki Vilma Pascual, personal siyang nagdulok sa municipal administrator na si Jun Aguas ngane na magpapirma nin job order alagad dae suboot ini pinirmahan asin ipigrason na dae pa nagigin OKAY an alkalde asin si ‘Ma’am Mariz’.
Huli sa rason na ini, nagtutubod si Pascual na pinersonal siya kan alkade huli naman sa isinangat niyang kaso sa Ombudsman na graft and corruption.
Kun babalikan, isinumiter an kaso sa Ombudsman kan nakalihis na taon kan madiskubre suboot ni Pascual na pigdara sa harong kan alkalde an duwang sako nin bagas.
Kan maghampang man suboot an duwang lado, sinabi kan alkade na para sa food for work an nasambitan na bagas na pig-solicit kan elementarya.
Segun pa ki Pascual, dae na dapat pa dinamay kan alkalde an duwa pang empelyado huli sa wara man suboot na pagkaisi an mga ini.
Dugang pa kan empleyado, dae siya natatakot sa opisyal huli ta aram niya an saiyang ginibo asin wara nin nagbusol saiya ngane na gibuhon an nasambitan na lakdang.
