LEGAZPI CITY-Piglatag kan legal counsel kan extrajudicial killings (EJKs) asin human rights lawyer Atty. Neri Colmenares an duwang legal na basehan ngani ipadagos kan International Criminal Court (ICC) an imbestigasyon asin posibleng paglilitis laban kay dating Presidente Rodrigo Duterte, maski pa naghale na an Pilipinas sa Rome Statute kan taong 2019.
Segun sa abogado, enot sa irarom kan Article 127, nagtetenir an obligasyon kan nacion sa mga kasong pinoonan mantang miyembro pa ini kan Rome Statue, kaiba an preliminary examination na inilunsar kan 2018.
Ikaduwa, sinabi pa niya na pigbisto kan gobierno an hurisdiksyon kan ICC sa paagi kan mga nagin aksyon kaini, kaiba an pagsusumiter kan mga dokumento kan 2021 asin 2022 na naghahagad na ipagpaliban an imbestigasyon.
Alagad, patanid ni Atty. Colmenares na kun papanigan an kampo ni Duterte, posibleng mahikayat an ibang lider na ibitaran an paninimbagan sa paagi kan pag-withdraw sa ICC.
Mientras tanto, nanindugan an mga pamilya kan mga biktima na ipagpapadagos ninda an laban para sa hustisya.
Piglalaoman man na ipapaluwas kan Appeals Chamber kan ICC sa aga, Abril 22, bandang alas-11 nin pagka-aga (oras sa The Hague Netherlands) o alas-5 nin hapon (oras sa Pilipinas) an pinal na desisyon sa apela kan mga abogado ni dating Presidente Rodrigo Duterte sa isyu kan hurisdiksyon kan korte sa saiyang kasong crimes against humanity.
