LEGAZPI CITY-Idineklara na kan Congo an katapusan kan Ebola outbreak sa Kasai province makalihis magadan an nasa 43 katawo asin wara nang bagong kumpirmadong kaso sa nakalihis na 45 aldaw.
Segun kay Health Minister Roger Kamba, kaiba sa 53 kumpirmadong kaso an 43 nasawi.
Nagabot man sa labi 27,000 katawo an nabakunahan, kaiba an 4,000 front-line workers, na nakatabang sa pagpugol kan paglakop kan nasabing helang.
Ini na suboot an ika-16 na Ebola outbreak sa Congo poon kan 1976 asin ika-7 na outbreak sa Kasai province.
An outbreak sa Bulape, nagkalat man sa 4 na magkahararaning banwaan.
Nadifisilan man an World Health Organization sa pagtatao nin bakuna sa lugar huli sa limitadong access asin pondo.
An nakalihis na outbreak kan 2018 hasta 2020 sa west congo, ikinagadan kan labi sa 1,000 katawo.
Nagkapira man sa nacion an nahahandal huli sa presenteng naghahampang an west region sa M23 rebel group.
