LEGAZPI CITY – Tuminaob an duwang bangka sa kadagatang sakop kan Baras sa provincia kan Catanduanes nin huli sa raot kan panahon.
Segun ki Baras Municipal Disaster Risk Reduction and Management Office (MDRRMO) Operations and Warning Section Chief Edilyn Bautista sa intrevista kan Bombo Radyo Legazpi na may duwang parasisira na nagreport sa saindang opisina na may naagihan sindang duwang bangka na tuminaob mantang nasa lawod an mga ini.
Makalihis nindang makuwa an mga detalye, tulos nindang dinumanan an lugar kun sain nahiling kan mga parasisira an nasabing bangka.
Susog man sa mga impormasyon kan mga residente na warang nahiling na sakay an tuminaob na behikulong pandagat.
Pigtaram pa kan opisyal na mantang nagsasagibo sinda nin imbestigasyon, nakipagkoordinar sainda an tagsadiri kan bangka asin sinabi kaini na kusa niya ining inabandona.
Nagtaob suboot an saiyang pigsasakayan huli sa raot kan panahon na naeksperyensyahan sa banwaan asin sa kagayunan an may nakahiling saiyang ibang parasisira kun kaya nakalipat ini asin nakaligtas.
Sa presente, padagos an saindang paghanap an saro pa sa mga bangka na tuminaob sa nasabing kadagatan.
Pangapodan ni Bautista sa publiko na kun maraot an kamugtakan kan panahon, mas maray na suboot na dae na magdagos sa paglawod nganing malikayan an mga siring kaining insidente.
