LEGAZPI CITY- Pigkukwestiyon sa ngunyan kan nagkapirang grupo an mga nagluluwas na bagong impormasyon manungod sa pagkagadan kan mga pulis sa duwang aktibista sa Guinobatan, Albay.
Hulyo 26 kan mga magadan kan mga pulis sinda Jemar Palero, 22 anyos, asin Marlon Naperi, 38 anyos makalihis na mahiling na nagpipintura sa Banao Bridge asin suboot nanlaban.
Sa intrevista kan Bombo Radyo legazpi kay Nica Ombao an regional coordinator kan Gabriela Bicol, nakaulay na ninda an mismong mga pag-iriba kan duwang nagadan na aktibista asin suway an testimonya kaini sa mga pahayag na pigpapaluwas kan PNP.
Segun kaya sa pag-iriba kan mga aktibista kan mangyari an insidente, dae man nanlaban asin buhay pa an duwa kan ilunad kan mga pulis sa saindang mobile nganing darahon sa presinto.
Nagluwas pa sa isinagibong autopsy sa bangkay kan mga biktima na sa likod hali an tama kan bala mantang igwa pa nin mga pasa an hawak ninda Palero asin Naperi na posibleng indikasyon na pigturtore muna ini antes na gadanon.
Pigkukwestiyon pa ni Ombao an kwestiyonableng report kan PNP kung sain pigsabing alas 11:00 nin banggi kan maaktohan an mga aktibista na nagpipintura sa tulay alagad ala 1:00 naideklarar na Dead on Arrival pag-abot sa ospital.
Pigkakangalas kan grupo kung nata inabot pa nin nasa duwang oras an pagdara sa ospital sa mga biktima maski na pigsasabing nanlaban an mga ini pag-abot kan mga pulis.
Sa ngunyan pig-iimbestigaran na kan Commission on Human Rights an insidente mantang mismong si PNP Chief Lt. Gen. Guillermo Eleazar na an nagsugo sa Internal Affairs Service (IAS) na maimbestigaran man an pagkagadan kan duwang aktibista.
