LEGAZPI CITY- Kawaran nin headlight an ipigtutukdong rason kan banggaan kan duwang motorsiklo sa provincial road na boundary man kan Brgy. Mayao asin Busac, banwaan kan Oas sa Albay.
Nagresulta an head on collision sa pagkagadan kan duwang driver na binistong sinda George Culasi asin Havey Realizan.
Sa intrevista kan Bombo Radyo Legazpi ki PC/Insp. Domingo Tapel Jr., pigtutubudan na parehong marekas an pagpapadalagan kan duwa huli ta straight an tinampo asin nanotaran an totally wrecked na enotan na parte kan duwang behikulo.
Dugang pa kan opisyal na maliwanag asin may ilaw man sa nasabing lugar mientras na wara man na narekober na helmet sa pinangyarihan kan insidente.
Sa ngonian, nagpapadagos pa an imbestigasyon kan mga otoridad urog na sa posibilidad kun nasa irarom nin impluwensya nin arak an mga imbweltong indibidwal mientras na dinara na sa punerarya an mga ini.
