LEGAZPI CITY- Nagtutubod an Department of Trade and Industry (DTI) Competitiveness Bureau na kayang-kaya kan mga Pilipinong negosyante na makipagsabayan sa mga kumpanya sa ibang nasyun.
Katakod kaini, ma-opresir ngunyan na aga an nasambitan na ahensya nin libreng learning session para sa mga Bicolano na nagmamawot na mapabaskog an saindang mga negosyo.
Sigon sa Acting Division Chief kan DTI Competitiveness Bureau na si Philip Jason Roque, nasa rehiyon sinda ngunyan huli sa kamawotan na magtao nin kaaraman sa mga negosyante digdi para sa kakayanan na makipag-kompetensya sa ibang organisasyon sa luwas kan Pilipinas.
Dugang pa ni Roque, kaipuhan na tutukan kan mga ini kun ano an mga proseso na dapat na magdalagan sa laog kan sarong negosyo asin bako sana an pagpapabakal nin produkto.
Philippine Quality Award an saro pa sa mawot na i-promote kan ahensya kun sain gigibuhon na modelo an “excellent perfomance” kan mga kumpanya sa Estados Unidos.
Ineksplikar ni Roque na ini an masirbeng framework o giya kan mga negosyante sa mga prosesong ipapa-utob sa laog kan saindang organisayon.
Ngani na urog na masabotan an programang ini, pig-iimbitaran kan nasambitan na opisyal an gabos na interesadong Bicolano na mag-atindir sa sesyon atyan na alas 9:00 nin aga sa Oriental Hotel
.
