LEGAZPI CITY – Nagsagibo nin surprise inspection an Department of Trade and Industry Catanduanes sa mga paratienda nin paputok sa banwaan kan Virac sa naunambitang provincia.
Segun kay DTI Catanduanes Provincial Director Mabel Escueta sa intrevista kan Bombo Radyo Legazpi na parte ini kan saindang pag monitor nganing masyerto an kaligtasan kan mga nagbabakal urog nang paparani an bagong taon.
Kaibahan ninda sa ikinondusir na monitoring an mga personahes kan Philippine National Police, Bureau of Fire Protection asin an Municipal Government kan Virac.
Nakahiling sinda nin sarong tindahan na nagpapabakal nin mga imported na paputok asin tulos na kinompiska nin huli ta wara ini nin mga magkakanigong dokumento na nag-agi ini sa salbadong proseso.
Pigtawan doon pa ni Escueta na saindang pig-oobliga an mga paratienda na magkaigwa nin signages asin mga bagay na pamatay-sunog arug kan fire stinguisher, baybay asin tubig enkaso may biglang kumalayo o pumutok sa stall.
Magayon suboot an kinaluwasan kan saindang monitoring ta nagin marikas an inspeksyon sa mga stall nin huli ta naka-hilera asin nakatipon an mga paratienda sa sarong lugar.
Sa kabilugan, wara man sindang nadadakop na nagbayolar partikular na sana kan pagpapabakal nin ilegal na paputok nin huli ta pigpapahigot an monitoring asin nagsairarom man an mga paratienda sa seminar manungod sa mga produktong saindang pigpapabakal.
Pangapodan kan opisyal sa publiko na dae ipagpalit an kaligtasan kaysa sa panandaliang kaugmahan kun kaya magin maingat nganing maibitaran an pagkadisgrasya kasabay an pagirumdom sa mga nagtitinda na dae magpabakal sa mga menor de edad nganing dae na magdakol an mga jovenes na nalulugadan nin huli sa paggamit nin paputok.
