LEGAZPI CITY — Pinunan na kan Department of Social Welfare and Development (DSWD) an pag-distribuir kan cheque sa concerned local government units (LGUs) para sa pagkondusir kan cash-for-work (CFW) program sa provincia kan Albay.
Sa irarom kan memorandum of agreement sa LGUs kan Albay, nag-alokar an DSWD nin P72 milyon para sa CFW para sa mga pamilyang apektado kan pag-aalburuto kan Bulkang Mayon.
An sarong benepisyaryo kan SFW an nagre-resibe nin P290 kada aldaw sa laog nin 10 aldaw na pagtatrabaho. An trabaho kaini an nakabase sa pangangaipuhan sa evacuation center kun sain sinda nagtenir.
An banwaan kan Daraga an enot na nagresibe kan pondo na nagkakantidad nin P7.7 milyon (P7,708,200) para sa 2,658 na benepisyaryo. Kan nakalihis na aldaw, nag-turn over man kan cheque an DSWD sa banwaan kan Guinobatan.
Pwedesir man na ma-claim kan ibang LGUs an cheque sa DSWD-Field Office sa ciudad kan Legazpi.
Segun ki DSWD OIC Secretary Emmanuel Leyco, naglalaom an departamento na mai-implementar an CFW ngonian na bulan ngani na magkaigwa nin kita an evacuees mantang nagtetenir sa evacuation centers.
Mientras tanto, nagkokondusir man an DSWD-Field Office nin storytelling sessions sa manlain-lain na evacuation centers sa Guinobatan bilang parte kan psychosocial activities sa mga kaakian ngani na makatabang sa pag-cope up sa presenteng sitwasyon.
