LEGAZPI CITY—Nagpaabot na nin tabang an Department of Social Welfare and Development Bicol para sa pamilya kan nasa walong internally displaced persons na binawian nin buhay sa katahawan kan aktibidad kan bulkang Mayon.
Segun ki DSWD Bicol Regional Director Norman Laurio, sa intrevista kan Bombo Radyo Legazpi, binawian nin buhay an mga ini huli sa may dati na sindang namamatean na malubhang helang bago pa man nairilipat sa mga evacuation centers asin saro digdi an naimbuelto sa vehicular accident.
Kabale sa saindang ibinarewas na tabang an cash relief assistance asin burial assistance para sa mga kaparientes kan mga namaaram na indibidwal na nakamati nin chronic disease.
Dugang ni Laurio na suminakat na sa pocomas o menos P108,000 an kantidad kan naiheras na tabang sa irarom kan Assistance to Individuals in Crisis Situation (AICS).
Afuera digdi, tulos man sinda nagtao nin psychosocial intervention para sa mga pamilya kan mga namaaram na internally displaced persons.
Mientrastanto, sienerto man kan opisyal na padagos an saindang ipigbabarewas na asistensya katabang an mga local government units sa gabos na apektado kan pag-alburoto kan nasabing bulkan.
