LEGAZPI CITY- Nagpaabot na nin tabang an Department of Social Welfare and Development Bicol sa pamilya kan nawawarang mga parasisira sa banwaan kan Pandan, Catanduanes.
Segun ki DSWD Bicol Director Norman Laurio sa intrevista kan Bombo Radyo Legazi na kaibanan sa itinaong tabang an pagkaon asin iba pang ayuda sa irarom kan Assistance to Individuals In Crisis Situations.
Para sa pamilya kan mga nawawarang parasisira, natawan an mga ini nin nasa P10,000 cash asin food packs.
Napag-araman na an pamilya man kan saro sa mga parasisirang nadukayang wara ng buhay an igwa pang suway na asistensya na naipaabot.
Para sa iba pang dae nakakaresibe kan nasabing ayuda, sinierto kan opisyal na padagos sindang nakikipag koordinar sa mga lokal na gobierno ngani na mapaabutan man nin tabang an mga ini.
Nagpahayag man si Laurio nin kahandaan sa pagtataong suporta sa nagpapadagos na search and rescue operations.
