LEGAZPI CITY—Karsel an bagsak kan sarong indibidwal sa ginibong buy-bust operation kan mga otoridad sa banwaan kan Libon, Albay.
Segun ki Libon MPS Chief of Police Police Major Roberto Flores, sa intrevista kan Bombo Radyo Legazpi, binisto an suspek na si alyas “Lon”, may live-in partner, 42-anyos, sarong driver asin residente kan Barangay Nogpo kan nasabing banwaan.
Nakumpiskar digdi an duwang pidasong heat sealed transparent plastic sachets na may laog nin pigtutubudang shabu asin gabat na 1.80 gramo na may street value na P12,240.
Afuera digdi, nakumpiskar man saiya buy-bust asin boodle money na ginamit sa transaksyon, sarong cigarette pack, mga personal na dokumento asin sarong unit nin motorsiklo na may kaibang lyabe.
Sa presente nasa kustodiya na kan Libon MPS an suspek para sa magkakanigong disposisyon.
Mensahe man kan opisyal na padagos an saindang kampanya kontra ilegal na droga kaya pigengganyar niya an publiko na mag-report sa saindang ofisina nganing dagos nang mapuho ini sa nasabing komunidad.
