LEGAZPI CITY — Nagtutubod si First District of Albay Board Member Job Belen kan Junta Provincial na madidipisilan na an Department of Public Works and Highways (DPWH) Regional Office 5 na ipagpadagos pa an Eco-tourism road network project kaini sa pamitisan kan Bulkang Mayon.
Ini makalihis na ipapundo kan Department of Environment and Natural Resources (DENR) an proyekto sa pagpalyar na makompleto an mga kinakaipuhang dokumento partikular na an environmental compliance certificate (ECC).
Sa intrevista kan Bombo Radyo Legazpi sa nasabing opisyal, nagluluwas suboot sa isinagibong committee hearing na nagpensar an DPWH na non-coverage certificate (NCC) an itatao sa DENR urog na sa existing road project puon sa Brgy. Bonga kan Bacacay hasta sa Brgy. San Roque kan Malilipot.
Alagad, napag-araman na target man digdi an interconnectivity road sa ciudad kan Tabaco asin Malilipot na ipigkokonsiderar na bagong proyekto mientras na nakapalaog man suboot ini sa 6km radius Permanent Danger Zone (PDZ) kan Mt. Mayon.
Ipigheras pa kan opisyal na nasa P50 million an itinagamang pondo para sa nasabing proyekto na konektado sa general perspective na circumferential road.
Mientras tanto, klinaripikar man kan opisyal na bako sinda kontra sa pag-uswag alagad tinawang-duon na responsibilidad kan lokal na gobierno siring man kan junta na maasegurar an seguridad kan mga residente na hararani sa lugar katakod kan nasabing proyekto.
