LEGAZPI CITY – Nahihiling kan kapulisan na magigin magayon an kakaluwasan kan Double Barrel Aplha Reloaded katakod kan pagbabalik kan kapulisan sa kampanya kontra iligal na droga.
Segun ki PS/Supt. Ronaldo Cabral, Sorsogon Police Provincial Office (PPO) Director, mas matatawan ini nin focus huli sa direktiba sa PNP na makupagkoordinar sa church groups kun magkokundusir nin operasyon.
Inako man kaini na talagang kinakaipuhan kan kapulisan nin tabang asin suporta hali sa mga religious sector kun sain nahiling man kan PNP an suporta kan mga ini sa pagpupuon pa sana kan kampanya kontra iligal na droga.
Dugang pa kan opisyal, imbitado an mga representante kan simbahan na magsabay sa saindang mga operasyon alagad dae man pigpipirit an mga ini huli ta aram man ninda na dakol na mga bagay man an pig-aasikaso kan mga ini sa saindang parokya.
Mientrastanto, nakatalaan man na magkaigwa nin pag-oolay an Sorsogon PPO asin PDEA ngani na ma-assess an gabos na barangay sa probinsya na ipigdeklarar nang drug cleared kun sain hagad man ni Cabral an suporta kan Sangguniang Panlalawigan ngani na mapirmahan na an resolusyon.
