Nagluwas an Department of Labor and Employment nin guidelines para sa tamang pasweldo sa holidays ngunyan na bulan kan Hunyo 2025.
Sa inisyung Labor Advisory 8 series of 2025, tinawan-doon kan DOLE na dapat masunod an payment pay rules para sa mga holiday sa Hunyo 6 bilang pag-obserba sa Eid’l Adha asin sa Hunyo 12 bilang paggiromdom sa Independence day na idineklarang regular holidays salig sa inisyu kan Palasyo Malacañang na Proclamation 911.
Sa mga empleyadong malaog sa regular holiday, dapat na makaresibi an mga ini nin double pay o 200% kan basic wage para sa enot na walong oras.
Kun lagpas nin walong oras o overtime sa regular holiday, dapat na makaresibi an empleyado nin kadugangang 30% kan saiyang orasang sahod afuera pa sa double pay.
Kun nagkataon man na rest day asin naglaog sa regular holiday, dapat na makaresibi an empleyado nin kadugangdang 30% kan basig wage afuera pa sa double pay.
Kun lagpas sa walong oras na trabaho asin nagkataon na naglaog sa rest day, dapat na matawan nin dugang na 30% kan orasang sahod an empleyado.
An mga empleyado man na dae malaog sa regular holiday an dapat na makaresibi nin 100% kan saindang sahod, basta an empelyado an naglaog sa trabaho o naka-leave of absence with pay sa aldaw bago an regular holiday.
Kun an aldaw man bago an regular holiday an non-working day sa sarong establishimento o scheduled rest day kan sarong empleyado, dapat man liwat na makaresibi nin holiday pay kun nagtrabaho an empleyado o naka-leave of absence with pay sa mismong aldaw bago an non-working day o rest day.
