Pinahimutikan kan Department of Justice na igwang katotohanan an pag-aprobar kaini sa pagpaaram ni former Department of Public Works and Highways Secretary Manuel Bonoan.
Segun mismo ki Justice Secretary Fredderick A. Vida, dae ninda inaprobaran an plano kan dating secretary na maghale sa nasyon.
Sa ibong kan totoong nagpaaram ini sa departamento, pinahimutikan ni Justice Sec. Vida na inaprobaran an saiyang surat.
An ginibo sana suboot kan prosekusyon iyo an pagnotae o pag-ako kan paaram ni Bonoan sa saiyang planong paghale.
Kontra ini sa dai pa sana nahahaloy na pahayag ni former Sec. Bonoan na inaprobaran kan departamento an saiyang pagbyahe pasiring sa America para sa medical needs kan saiyang agom.
Piglinaw man kan Department of Justice na bako sakop kan saindang mandato an pagtao nin permiso o pagpugol sa sarong indibidwal na magluwas sa nasyon huli ta derechos ini kan lambang saro.
Alagad, huli ta nagpaluwas na nin direktiba an korte, dae pwedeng maghale na daeng permiso si dating Sec. Bonoan asin an saiyang mga co-respondent sa plunder complaint asin iba pa.
Nagpaluwas nin ‘precautionary hold departure order’ an Manila Regional Trial Br. 52 laban ki Bonoan, Sen. Jinggoy Estrada, dating Public Works Usec. Roberto Bernardo, Henry Alcantara asin Gerard Opulencia.
Alagad, pighiras ni Justice Spokesperson Atty. Polo Martinez na igwa pang remedyo na pwedesir gibuhon kan ibong na kampo o ‘respondents’ kun mawot nindang magbiyahe paluwas sa nasyon.
Pwedesir man suboot sindang magsangat nin mosyon sa korte nganing i-lift an ipinaluwas na ‘precautionary hold departure order’ asin tugotan na makaluwas sa Pilipinas.
