Sienerto kan Department of Health (DOH) sa publiko na an mga ospital sa Metro Manila an preparado asin may kapasidad na magresponde en kaso mag-abot an pig-aapod na “The Big One,” sarong dakulang linog na pwedesir na magtama sa rehiyon.
Segun ki DOH Secretary Ted Herbosa, sienerto niya na an gabos nin mga ospital na pigmamaneharan kan DOH an may kakayahang magdugang nin 10% sa saindang presenteng bed capacity.
Ini nganing masierto nin mas dakol na pasyente an pwedesir na ma-akomodar en kaso magkaigwa nin mahewasang pangangaipuhan para sa medikal na atensyon pagkatapos kan sarong dakulang kalamidad.
Afuera pa digdi, sinabi ni Secretary Herbosa na an kada ospital an igwa nin mga contingency plan na handa nang ipaotob.
An mga planong ini an obhetong siertohon na an mga ospital an pwedesir magpadagos sa pagtao nin serbisyo sa mga pasyente maski sa tahaw kan sarong dakulang kalamidad.
Tinawan-doon ni Herbosa na an mga DOH hospitals na mahahanap sa Four Quadrants kan National Capital Region (NCR) an may bastante na surge capacity.
Dugang pa niya an mga ospital an igwa man nin bastanteng emergency supplies, siring kan mga bulong, medical supplies asin iba pang kagamitan na kakaipuhan sa pagresponde sa kalamidad.
Ipigdugang pa ni Secretary Herbosa na an gabos na ini an parte kan mas pinahigot na disaster preparedness kan ahensya.
