LEGAZPI CITY- Dakula an pasasalamat kan Department of Health Bicol sa gabos na donors na nakisumaro sa Dugong Bombo 2024 na inorganisar kan Bombo Radyo.
Segun ki DOH Bicol Donor Recruitment Officer Nurse II Nicole M. Bejo na dakulang tabang an aktibidad ngani na masuplayan an mga blood banks urog na ngunyan na magkakasunod an mga kalamidad na tuminama sa nacion.
Aminado kaya an opisyal na nagbaba an suplay kan dugo sa rehiyon urog na kan tuminama an bagyong Kristine.
Dugang pa ni Bejo na an sarong donor an posibleng makapagsalbar nin nasa tulo hasta limang pasyante kaya dakulang tabang an mga blood letting activities siring kan Dugong Bombo 2024.
Inasegurar man kaini na salbado an mga pasyente huli ta nagkakaigwa nin check up antes na kuwaan nin dugo an sarong persona.
