LEGAZPI CITY-Inasegurar asin pigkumpirma kan Department of Migrant Workers na salbado na an 31 Overseas Filipino Workers na pig-pick up kaini na na-stranded sa saindang delayed flight pauli sa nacion.
Makalihis ini kan halipot na panahon, na isara kan Qatar an saindang airspace ngonian na aldaw, na nagresulta sa pagkaatraso kan nakatalaan na repatriation flights kan nagkapirang mga kababayan na Pilipino.
Segun sa pinaluwas na pahayag kan ahensiya sa paagi kan mensahe ni Secretary Hans Leo Cacdac, pigsierto ninda an kaligtasan kan mga OFWs.
Sinabi ninda na an mga opisyales kan gobyerno, orog na an embahada kan Pilipinas, nakatutok sa pagsimbag sa mga pangangaipo sa repatriation kan mga Pilipino na na-stranded sa iriwal kan Iran-Israel.
Sinabi man ninda na nakikipagkoordinar man an departamento sa Qatari Ministry of Interior na iyo an nangengenot sa plano na maibalik an mga Pilipino sa nacion kun sain nagpapasalamat an nasambitang ahensiya.
Nakikimaherak asin nangangapudan man sinda na likayan an pagpalakop nin mga salang impormasyon ngani na maibsan an nangyayaring ‘panic’ kasabay kan pagpagirumdom sa mga OFWs na magin kalmado, lalo na an mga nasa Middle East.
Mientrastanto, makakalaom an mga pamilya kan mga Overseas Filipino Workers na padagos na gigibuhon kan ahensya an mga aksyon para masierto an saindang ligtas na pagbalik sa Pilipinas.
