LEGAZPI CITY- Labing kaugmahan pa an namamatean ngunyan kan Top 9 sa August 2024 Food Technologist Licensure Examination makalihis an trayumpo na nakuwa kaini.
Segun ki Joseph Bryan Defeo sa intrevista kan Bombo Radyo Legazpi, aminado ining dae niya pinaglaoman na makukuwa an nasabing akomplishimento huli sa mga angat na pigkahampang.
Pag-istorya kaini na nadifisilan siya na pagbalansehon an trabaho asin an pagre-review.
Nagin sikreto suboot niya ito an disiplina sa sadiri asin an commitment sa saiyang pigigibo.
Pinasalamatan man kaini an inaplayan na review center na nagtabang saiya ngani na makasunod sa flow kan mga pag-aadal.
Sa presente, pigkokunsiderar man ni Defeo an pagkuwa nin Masters Degree sa Food Science alagad padiit-diit pa suboot na pigsasapinal an mga plano.
Marurumduman na ini an enot na bes na igwang topnotcher hali sa Bicol University College of Industrial Technology huli ta ini pa sana an ika-duwang taon kan nasabing eksaminasyon.
Mientras tanto, sinabi ni Defeo na inspirasyon niya an saiyang ina na itinaguyod siya sa ibong kan pagigin single parent kaini.
