LEGAZPI CITY- Padagos an pag-opresir nin tabang kan Simbahang Katoliko sa mga pobreng namamanwaan sa nasyun.
Kun sa Manila ipiglatag ni Archbishop Luis Antonio Cardinal Tagle an programang HAPAG-ASA na sarong feeding program na pigpopondohan kan Pondo ng Pinoy, an Diocese of Legazpi igwa nin TADA o Tanganing an Dukha Atamanon.
Maogmang ipigheras ni Father Rex Arjona sa Bombo Radyo Legazpi kun para sain an nasambitan na programa.
Sigon ki Father Arjona, pigtatabangan kan TADA an mga nagtitirios na tawo sa paagi kan mga ipigheheras o ipigtatagamang tabang kan may mga marhay na boot.
Pinakamayor na katuyuhan kaini na tabangan an dukhang Albayano.
Dugang pa kan padi, tamang-tama an panahon kan Kwaresma para digdi kun sain bako sana an mga pobre an pigtatawanan nin asistensya kundi an mga biktima nin diskriminasyon asin pang-aabuso kabale na an iba pang ipigsisikwal kan komunidad.
Apwera digdi, igwa man suboot sinda nin Soup Kitchen na nagpapakaon nin libre sa mga nagugutom alagad dae nin pambakal nin pagkakan.
Yaon man suboot an saindang pagtabang para sa salud, trabaho, proteksyon sa mga naaabuso asin sa mga biktima nin kalamidad.
