LEGAZPI CITY – Nagpatanid an sarong dermatologist mapadapit sa mga kawsa asin epekto kan hairloss o pagkalagas nin buhok kan sarong tawo.
Segun ki Dr. Cara Chia kan Philippine Dermatological Society sa intrevista kan Bombo Radyo Legazpi na komon na nangyayari sa maski anong kasarian asin maski anong edad alagad dae aram kan nagkapira kun ano an normal, dapat ikahandal asin ano an dapat gibuhon kaini.
Maaapod suboot na normal an sarong hairfall kun maabot ini sa 50 to 100 strands kada aldaw alagad kaipuhan man giraray hilingon an anit urog na kun may lugad huli maikokonsidera na ini bilang warning signs.
Kadaklan sa mga rason kan hairloss iyo an stress, namamana o genetic, hormonal changes, kulang sa nutrisyon, auto-immune condition asin labing pag-diet.
Pigtaram pa kan nasabing espesyalista na depende man sa rason kan pagkalagas an magigin treatment kan saindang buhok arug kan pwedesir na mag-inom nin bulong an iba asin an iba man an kaipuhan magsa-irarom sa hair transplant.
Kaipuhan suboot na magpakonsulta an sarong tawo kun naka-eksperyensya ini nin kompolan kan saiyang buhok an nalagas, bilang nagnipis ang buhok, kun may lugad o madaling ma-irritate an anit, asin kun naapektaran na an mental health.
Suhestyon niya na dapat maggamit nin mga gentle shampoos, ibitaran an sobrang higpit kan pagbugkos kan buhok, magkaon nin tama, imanehar an stress asin sleep schedule.
Paglinaw niya na bako 100 percent an kasyertuhan na magigin mtrayumpo kun magsasairarom an sarong tawo sa hair transplant huli ta bubugtakan man sana ini nin hairstrand alagad dae kaini mapupugulan an hair loss.
