LEGAZPI CITY – Nagpatanid an sarong dermatologist mapadapit sa huma nin psoriasis sa sarong indibidwal urog na kun dae maagapan.
Segun ki Dr. Riza Milante kan Philippine Dermatological Society sa intrevista kan Bombo Radyo Legazpi na an psoriasis an sarong auto-immune skin disease kun sain marikas an pagbilog nin bagong cell sa ibabaw kan kublit kan sarong tawo.
Nahihiling an helang sa anit, pusod, tuhod, ngimot, kuko, asin iba pang parte kan hawak asin pwedesir man an pagkakaigwa nin nana kun dae maagapan.
Dae man nakakahawa an psoriasis asin pwedesir man suboot na makuwa ini huli sa genes o naipapasa kan mga magurang sa saindang mga aki asin wara man na pigpipili na edad an matatamaan kan helang.
Pigtaram pa kan nasabing dermatologist na may mga pag-aadal man na nagluwas na saro man suboot an obesity sa kaiba na sintomas kan nasabing helang asin an mala-dandruff na itsura.
Kun dae suboot maagapan, pwedesir na umabot sa puntong mapagalan na magkakan an sarong indibidwal na may psoriasis huli ta nagigin sensitibo na an saindang mga kublit.
Importante man an amay na pagkonsulta sa mga dermatologist huli ta habangbuhay na ining matenir sa sarong tawo arug kan diabetes.
Pagdoon ni Dr. Milante na magrani sa mga espisyalista na nagkakapot kan mga kaparehong kaso asin ibitaran an pag-self medicate asin likayan an paggamit nin manlain-laing bulong na nababakal online.
