LEGAZPI CITY-Nagpakol na sa 15 katawo an nagadan sa banggaan kan tren harani sa Jakarta, Indonesia, na haros puro kababaihan an lunad susog sa mga awtoridad.
Nangyari an insidente kan Lunes sa Bekasi Timur Station kan makabangga suboot an sarong long-distance train sa likudan na parte kan nakaparadang commuter train.
An nasabing bagon nakatalaan para sa mga babaying pasahero na nagtatao nin espasyo kontra sa harassment.
Uminabot sa 88 an nairido na tulos dinara sa ospital mantang an mga nagadan, pigbeberipika pa an pagkakakilanlan.
Susog sa state-owned railway operator PT Kereta Api Indonesia, ligtas man an nasa 240 pasahero kan long-distance train na imbuelto sa insidente.
Padagos an imbestigasyon kan mga awtoridad, kabale an Indonesian police asin an National Transportation Safety Committee, ngani matukoy an eksaktong kawsa kan aksidente.
Katakod kaini, kinumpirma man kan National Search and Rescue Agency (Indonesia) na natapos na an rescue operation asin wara nang nadagdag pa na biktima.
Aminado an mga otoridad na pirmihan an mga aksidente sa lumang railway system kan Indonesia kun saen kan Enero 2024, saro man na train collision an nangyari sa West Java na nagresulta sa pagkagadan kan dai mababa sa apat na katawo.
