Makusog na inapod ni House Deputy Minority Leader asin ML Party-list Rep. Leila de Lima na malinaw na judicial overreach an desisyon kan Korte Suprema manungod sa impeachment case laban ki Vice President Sara Duterte.
Ini an sentimento kan mambabatas kasunod kan propwesto ni Senate President Tito Sotto na mag-olay an Senado asin Kamara nganing tukaron an nasabing ruling.
Segun ki De Lima, suportado niya an pangapodan ni Sotto huli ta garing nakiaram an korte sa poder kan lehislatura.
Nagpatanid an kongresista na pwedesir ikonsiderar na judicial legislation an ginibo kan SC na nagpapaluya sa Kongreso bilang co-equal branch kan gobyerno asin nagbabalgar sa prinsipyo nin separation of powers.
Huli kaini, bukas an opisyal sa pag-amyenda kan Konstitusyon nganing malinawan an mga probisyon sa impeachment, alagad nagbugtak ini nin mahigot na mga kondisyon.
Piglinaw ni De Lima na matugot sana siya sa Charter Change (Cha-cha) kun an katuyuhan kaini iyo an gibohon na self-executing an pagbabawal sa mga political dynasties asin i-adjust an nagkapirang probisyon sa ekonomiya.
Alagad, nagpatanid an House Deputy Minority Leader na tulos niyang kokontrahon an anuman na lakdang kun an tunay na agenda kaini iyo an pagpalawig kan termino, paghale kan mga term limits, asin pagpaluya kan mga proteksyon kan deretsos humanos.
