LEGAZPI CITY-Ipigbuyagyag ni Dating Department of Public Works and Highways Undersecretary Roberto Bernardo an nagkapirang dating senador asin presenteng senador na nakaresibe suboot nin kickbacks sa mga proyekto kan flood control sa nacion.
Sa pagdangog kan Blue Ribbon Committee, ipighayag niya na may 20% commitment para sa tanggapan ni dating Senadora Grace Poe sa 2025 budget.
Sa ikatulong kwarter kan 2024, an pigranihan suboot siya kan tauhan ni Sen. Poe ngani ipaabot kay DPWH Secretary Manuel Bonoan an kamawotan kaini na ma-akomodar an mga proyekto kan senadora sa National Expenditure Program (NEP).
Sinabi ni Bernardo na ipinaabot sa saiya ni Secretary Bonoan na may nakalatag na ₱500 milyon para sa senadora asin sinugo siyang maghagad nin listahan kan proyekto.
Dagdag pa ni Bernardo, na igwa siyang transaksyon kay Department of Education (DepEd) Undersecretary Trygve Olaivar, na suboot nagpoon pa kan taong 2010 asin naghaloy pa hasta sa panahon kan budget preparations sa Senado.
Ipigbuyagyag man kan dating kalihim na nabisto niya si Usec. Olaivar kan staff pa sana ini ni Senator Bong Revilla asin kan maglipat ini sa opisina ni Senator Edgardo Angara asin Senator Sonny Angara.
Regular man suboot sindang nagoolay ni Usec. Olaivar ngani asikasuhon an kalagayan kan mga senador na sinda Senator Revilla asin Senator Jinggoy Estrada kan ini nakadetene.
Pigheras man niya na poon kan 2019 hasta 2024, nakaresibe suboot si Usec. Olaivar nin mga “deliveries” na 12% kan mga proyektong katakod suboot sa sa opisina ni Sen. Sonny Angara, mantang nasa Senate Finance Committee pa ini.
Pigbeberipika na man suboot an impormasyon na posibleng mag-abot sa ₱12 bilyon an nadugang sa unprogrammed appropriations ngonian na taon.
