LEGAZPI CITY – Padagos an pigtataong presenya kan Daraga Public Safety Office nganing maipaotob an pazy orden sa banwaan.
Segun ki Daraga PSO spokesperson Lorenzo Bañas sa intrevista kan Bombo Radyo Legazpi na naka heightened alert man an saindang opisina mapadapit sa mga nangyayaring pagkawara kan mga estudyante sa mga nagkapirang eskwelahan sa nacion.
Igwa sindang ipigbugtak na personel sa mga eskwelahan nganing magbantay sa seguridad kan mga estudyante nganing dae mangyari an mga kaparehong insidente sa banwaan.
Afuera digdi, naglalatawan na naman ngonian suboot an mga kawatan partikular na sa mga saudan asin matatawong lugar.
Pigtaram pa kan opisyal na may mga nakadeploy man na PSO personel sa mga matatawong lugar kan Daraga nganing matulag an mga mararaot na elemento na nanlalamang sa kapwa.
Dakulang tabang suboot an saindang warang patod na pagbabantay nganing dae na magbalo pa an mararaot na elemento na maggibo kan ilegal na mga gawi.
Kalimitang mga paratienda an pigpupuntirya kan mga kawatan partikular na kun dagsaan an mga tawo sa mga merkado publiko na nagkakawsa nin suksukan na nagreresulta sa pagkawara kan saindang mga kwarta asin gamit na dae ninda namamalayan.
Pigdugang pa ni Bañas na may mga na-turn over na man sindang mga kawatan sa polisya na nadakop na nanlalamang sa kapwa nganing matawan ini nin magkakanigong aksyon asin disposisyon.
Pagirumdom kaini sa gabos na mag-ingat sa pagpasyar asin pagsaod sa Daraga, magin vigilante, syertuhon an mga dara na kwarta, dae na magsulog nin mamahalon na alahas nganing dae mapontirya kan mga parahabon.
