LEGAZPI CITY-Nagkasararo an gabos na key stakeholders sa banwaan kan Daraga, Albay, ngani pakusugon an seguridad sa mga eskwelahan.
Ini kompwesto kan Local Government Unit (LGU), school heads, Municipal Social Welfare and Development Office (MSWDO), Barangay Councils, asin kan Daraga Municipal Police Station ngani ngani mapakusog an sararo asin proactive appproach sa pagsierto kan kaligtasan asin seguridad kan mga estudyante, mga paratukdo, asin mga school personnel.
Segun kay Daraga MPS Chief of Police Police Lieutenant Colonel Mary Grace Tagtag, sa intrevista kan Bombo Radyo Legazpi, na pig-presentar ninda an mga gigibuhon manungod sa pagmantenir kan peace asin security sa Daraga asin kun ano an mga mekanismo ngani masierto na ligtas an mga estudyante asin paratukdo sa laog asin luwas kan school premises.
Propwesto ninda na magkaigwa nin koordinasyon sa school authorities sa Daraga National Highschool asin Malabog National High School.
Siring man an pagkakaigwa communication platform o group chat ngani mas maparikas an reporting asin monitoring mekanismo kun igwang mga kontrabaho o anumang senyales na posibleng igwang child at risk.
Pinag-olayan man ninda an mga concern mapadapit sa seguridad kan mga estudyante asin paratukdo asin propwesto na magkondusir nin security survey asin inspeksiyon sa mga pampublikong eskwelahan.
