Sinuspinde kan Department of Agriculture (DA) an pagtatao nin grant assistance sa mga benepisyaryong dae nagbabayad kan saindang mga utang.
Sa irarom kan Memorandum Order No. 60, ipinagpalihis an tabang sa mga dae nakipag-koordinar sa bangko nganing ayuson an saindang pagkakautang.
An lakdang na ini an tugon sa nagdadakol na kaso kan dae pagbabayad sa irarom kan Agricultural Competitiveness Enhancement Fund (ACEF) Credit Program.
Obheto kan programa na magtao nin pautang sa mga paraooma, parasisira, asin saradit na negosyo nganing mapahalangkaw an saindang produksyon asin makapagpatindog nin mga pasilidad.
Pwedeng umutang nin hasta P5 milyon an mga kooperatiba asin hasta P1 milyon man an indibidwal na paraooma o parasisira.
Segun sa DA, itatao giraray an naunsyaming tabang kapag nabayadan na kan mga benepisyaryo an saindang pagkakautang.
