LEGAZPI CITY — Nagturuan an Department of Agriculture (DA) Bicol asin Department of Trade and Industry (DTI) Bicol sa ahensyang may kontrol sa price monitoring kan nagkapirang produkto sa merkado katakod kan ipigpapaotob na price freeze.
Ini an makalihis na mapag-araman na nagkaigwa nin pagsakat sa presyo kan nagkapirang agriculture products siring kan gulay asin sira sa ibong kan pagdeklarar sa Albay sa state of calamity.
Ipighayag man ni DA Bicol Director Elena delos Santos sa Mayon Camp Managers briefing na nakadepende suboot kaya sa kondisyon kan kadagatan an ipapataw na presyo kan mga parasira kasabay kan paghahayag na wara man suboot na regulatory power an ahensya sa nasabing isyu kaya nangangaipo pa nin suporta sa kapulisan urog na sa tahaw kan kalamidad.
Simbag man ni DTI Bicol Director Joy Blanco na kapot man giraray kan DA an kontrol sa presyo kan mga nasabing produkto sa irarom kan Price Act.
Suhestiyon man ni Presidential Adviser on Political Affairs Secretary Francis Tolentino na balikan asin irebisa an price control policy mantang nagpromesa na magin siya an mabalik man sa pag-aadal kaini.
Mientras tanto, napag-araman na walong kompanya sa Albay an kinasuhan kan DTI huli sa pagbayolar sa price tag policy.
