LEGAZPI CITY-Kinumpirmar kan mga content creator na si Gavin Capinpin asin Elma Asagra an saindang pagbubulagan makalihis an pitong taon na relasyon.
Sa magkasuhay na pahayag na saindang ipinaluwas sa social media kansudma, Hunyo 23, sinabi kan duwa na an saindang desisyon na magbulagan, resulta kan personal na problema na haloy na nindang piga-atubang bilangmagnobyo.
Piglinaw ni Gavin asin Elma na warang third party na may koneksyon sa saindang pagbubulagan sa ibong kan mga espekulasyon na naglakop sa social media kan mga nakaaging semana.
Segon ki Elma, haloy na nindang pighingoa na maayos an saindang relasyon alagad nag-abot sa punto na dai na ninda namamatian an “mutual love” na igwa sinda sa lambang saro.
Nag-insistir man siya na an mga retrato na naglilibot sa online na nagkokonektar ki Gavin sa sarong babae na nagngangaran na Ayra, sarong maling interpretasyon sana kan publiko.
Sinabi man ni Gavin na ginibo ninda an gabos ngani masalbar an saindang relasyon alagad nagdesisyon sindang magbulagan huli ta padagos sindang nakukulugan.
Nagpasalamat man sinda sa kada saro para sa mga tawong saindang pinag-iribahan asin para sa mga tagasuporta na padagos na nagsusunod sa saindang journey.
An saindang relasyon dai pa sana nahahaloy nagin mainit na tema makalihis na ikonektar si Gavin sa mga alegasyon nin cheating, na pareho nindang pignegaran bago sa saindang anunsyo kan pagbulagan.
