LEGAZPI CITY — Piglalaoman ngonian kan Department of Tourism (DOT) Bicol na magiging maray an inter-agency coordination ngane na maging magayon an resulta kan paparaning ASEAN meeting sa maabot na Agosto 21 sundo 25.
Segun ki DOT-Bicol Administrative Officer Bobby Gigantone, kaipuhang maging tutok an ka-partner na ahensya sa preparasyon, sa pagtao nin guidelines asin procedure ngane na maging maugma an mga mabisitang ASEAN-member countries sa Albay.
Mapatotoo man suboot an kahandaan kan Albay na preparado na an provincia sa anuman na international event asin sarong magayong exposure ini ngane maipahiling an “best of Bicol.”
Alagad sa ibong kan mga preparasyon, ipigkokonsiderar kan ahensya na dakulang agyat an mga tinampo sa provincia na nasa irarom kan construction.
Kaipuhan suboot na imanehar an traffic ngane na dae magkaigwa nin aberya, dae maka-eksperyensya nin delays, inconvenience asin dae maapektaran an seguridad kan mga delegado.
Sinabi pa ni Gigantone na kaipuhang kaolayon kan Department of Public Works and Highways (DPWH) an mga contractor na in-award-an kan proyekto ngane na dae man maging “eyesore” an mga under construction na mga tinampo urog na sa banwaan kan Daraga.
May responsibilidad kaya kan DPWH na mapakaray an preparasyon para sa aktibidad ngane na maitao an iprinomesang maray na serbisyo asin dae man suboot ini pwedesir na i-cover up o pagtakpan huli sa kaipuhan nindang magsumite nin post report.
Mientras tanto, sinabi pa ni Gigantone na preparado naman an tourist-police unit kan Daraga para sa security protocols and measures ngane imantenir an kapalibutan.
Sinabi pa kaini na bako sana an mga ahensya an pwedesir magtarabang kundi maging an mga nasa komunidad kan Daraga siring kan mga tanod, senior citizens ngane na maging matrayumpo an aktibidad asin mai-promote an nasabing banwaan.
