LEGAZPI CITY – Nakatalaan na magbukas sa maabot na Abril 1 an pighahanda na aktibidad kan Segundo Distrito sa pangengenotan ni 2nd District Representative Joey Sarte Salceda.
Segun ki Peter Encisa kan 2nd congressional district office, pinagpeprepararan kan mga lokal na opisyal an Congressional Cup 2017 kun sain bukas ini sa gabos na Barangay sa 2nd District kan Albay.
Pighayag ni Encisa na magkakaigwa nin apat na kategorya sa nasambitan na pakawat kun sain iyo an Junior Division na papartisiparan kan mga jovenes na 18-anyos pababa, Senior Division na kumpwesto kan 18-anyos pataas, an dibisyon para sa mga 40-anyos pataas asin an Intercommercial na hali sa bukas provincewide na sarong grupo na kumpwesto kan anuman na organisasyon, kumpanya, asin koponan kan eskwelahan na pigtutugutan na magkua nin duwang import.
Obheto suboot kaini na madiskubre asin mahasa an talent kan mga jovenes siring man na mairayo an mga ini sa impluwensya kan iligal na droga.
Mientrastanto, pigduon kan opisyal na warang entry fee an pakawat asin personal na ididistribwer kan an mga form asin requirement sa mga barangay kapitan.
Pigsiyerto man kaini na naghahalat sa mga manggagana an darakulang papremyo.
