LEGAZPI CITY – Nakipagpartner an Commission on Elections sa University of the Philippines ngani na makapagpaluwas nin rules and regulations para sa paggamit nin artificial intelligence ngunyan na paparaning eleksyon.
Sa intrevista kan Bombo Radyo Legazpi kay Commission on Elections Bicol Director Atty. Ma. Juana Valeza, huli sa marikas na pag-uswag kan artificial intelligence saro na ini sa ngunyan na mga piggagamit kan kandidato sa panahon nin kandidatura kung kaya kaipohan na maggibo na nin lakdang an komisyon ngani na maibitaran an pang-aabuso kaini.
Plano kan Commission on Elections na magkriar nin polisiya na magsasabi kung hasta sain sana pwedeng magamit an nasabing teknolohiya.
Magpapaotob man nin regulasyon na magbabawal sa paggamit kan AI sa panraraot sa kalaban na politiko asin pagpapalakop nin fake news.
Aminado si Valeza, na dae kakayanon kung an komisyon sana an matutok digdi kung kaya nakipagtabangan sa mga eksperto kan University of the Philippines.
Pangapudan kan opisyal sa mga kandidato ngunyan na maabot na eleksyon na maging responsable sa paggamit nin teknolohiya asin siertohon na gagamiton sana ini sa tama.
